Në Maqedoninë e Veriut është mbledhur sot Këshilli i Sigurisë, pas përkeqësimit të situatës së koronavirusit. KS i rekomandoi qeverisë shpalljen e gjendjes së krizës për 30 ditë.

Presidenti Stevo Pendarovski tha se një vendim i tillë nuk ka si qëllim orën policore.

“Zbatimi i gjendjes së krizës nuk ka asnjë lidhje me orën policore në gjithë territorin dhe fuqizimin e masave kufizuese eventuale ndaj lëvizjes së lirë”, u shpreh Stevo Pendarovski.

Ndërkohë, kryeministri Zoran Zaev deklaroi se për momentin nuk ka nevojë për orë policore, por nuk e përjashtoi si masë, nëse gjendja përkeqësohet.

“Nuk përjashtohet mundësia për mbyllje dhe orë policore, por për momentin një gjë e tillë nuk shqyrtohet. Ajo mbetet në kompetenca të Komisionit dhe dua të sqaroj se gjendja e krizës nuk ka lidhje me orën policore, por duhet respektuar masat e Ministrisë së Shëndetësisë dhe Komisionit që të evitohen lëvizjet e panevojshme pas orës 21.00 dhe të respektohen masat bazike”, deklaroi Zoran Zaev.