Policia e Shkodrës njofton se për protestën e zhvilluar një ditë më parë në këtë qytet, e cila pasi nisi paqësisht, u agravua dhe çoi në shkatërrim të disa objekteve, përfshirë këtu edhe selinë e PS, janë proceduar 46 persona, mes tyre dhe Voltana Ademi.
Policia bën me dije se nën akuzë janë dhe dy zjarrfikës të Shkodrës, të cilët sipas policisë kanë shpërdoruar detyrën dhe nuk i janë përgjigjur thirrjeve për fikjen e zjarrit në kohë.
Mes të proceduarve janë dhe 17 minorenë, që për shkak të moshën nuk mund të arrestohen.
“Specialistët për Hetimin e Krimeve, në bazë të pamjeve filmike, kanë proceduar penalisht 17 minorenë, për veprat penale ‘Shkatërrimi i pronës me zjarr’, ‘Organizimi dhe pjesëmarrja në grumbullime e manifestime të paligjshme’ dhe ‘Prishja e qetësisë publike”- thuhet në deklaratën e Policisë.
Po ashtu ata sqarojnë se janë zbuluar dhe organizatorët e protestës, ku mes të proceduarve ishte dhe Voltana Ademi, kryetare e Bashkisë Shkodër. Njëkohësisht do të hetohen për veprën penale “Organizimi dhe pjesëmarrja në grumbullime e manifestime të paligjshme” edhe 21 persona të tjerë të tjerë:
“ Janë proceduar si organizatorë të kësaj proteste, për veprën penale “Organizimi dhe pjesëmarrja në grumbullime e manifestime të paligjshme shtetasit V. A., A. S., A. Q., Z. Gj., S. H. , N. M., L. M. dhe I. Q”.
