Mbrëmjen e djeshme në mesnatë, Kida publikoi këngën e re me titull “Dinero”, e dyta për këngëtaren gjatë këtij sezoni veror dhe po ashtu kënga e dytë e albumit që ajo po sjell. Kida mban vulën e një prej super hiteve të kësaj vere “Dale”, së bashku me Butrint Imerin dhe Ledri Vulën. Por, duket se ka një problem dhe kjo këngë nuk po pritet aq mirë sa “Dale”. Kjo pasi, njerëzit, kryesisht dëgjuesit besnikë të Kidës, janë të pakënaqur, me tekstin e “Dinero. Dhe kritikat e tyre i kanë shprehur në sektorin e komenteve në YouYube.
Pak orë pas publikimit të këngës në YouTube, një nga komentet me më shumë pëlqime është ky:
“Kida është këngëtare dhe si këngëtare është super. Kompozitori s’di ca ka dashr me than me këtë tekst!”
Vlen të theksohet se Kida nuk i shkruan vetë tekstet e këngëve, mirëpo ky fakt nuk e justifikon tek dëgjuesit. “Po por tekstin e shohin dhe e zgjedhin dhe këngëtarët pasi ata do e këndojnë. Dhe unë mendoj se nëse Kida vazhdon kështu do fundoset!”- shkruan një dëgjuese.
Mes komenteve, të shumtë janë ata që i kërkojnë Kidës të ndryshojë bashkëpunëtorët, duke shkruar:
“Prisnim më shumë. Urgjent ndërrojë këta bashkëpunëtorët se publiku s’do kështu!”
“Ku janë talentat e tekstit?”
“S’po kuptoj çfarë ka dash me thanë kompozitori me këtë këngë, pastaj Kida është shumë e talentume!”
Ndërkohë, të tjerë janë zhgënjyer edhe nga videoklipi:
“Bëni një këngë dhe videoklip me kuptim ju lutem, jemi lodhur.”
Nuk mungojnë kritika edhe më të ashpra të tipit “Sa palidhje!” Mirëpo, problemi qëndron te stili. Prej disa kohësh, Kida ka nisur të eksperimentojë, duke dalë nga kornizat e vajzës së ëmbël me veshjet karakteristike në çdo videoklip, e me tekstet “soft”, duke ardhur shumë më ndryshe dhe “wild”. Këtë e kemi parë edhe te këngë si “Drunk” apo “Edhe sa”. Një dëgjuese e zhgënjyer shkruan:
“Nuk të shkon hiç ky stil. Imagjino pas një kënge të suksesshme si “Dale” me ardh me këtë këngë dhe tekst. Totalisht dështim dhe dëshpërim!”
Vlen të theksohet se këto komente të tilla kanë marrë goxha pëlqime, duke nxjerrë në pah se nuk janë të paktë njerëzit që mendojnë kështu.
Ndryshime të tilla në stil tek këngëtarët shoqërohen padyshim me rreziqe të mëdha dhe një ndër ta është zhgënjimi i dëgjuesve. Më herët këtë verë me një situatë të tillë janë përballur edhe Xhensila Myrtezaj dhe Tayna, të cilat kanë marrë komente të shumta negative për këngët respektive “Prit pak” dhe “Taka”.
