Kristen Stewart është përfolur gjatë për ngjashmërinë dhe talentin e saj në filmin e dedikuar Lady Diana-s, “Spencer”, por kësaj radhe do të ndalemi diku tjetër: Tek fustani që mban veshur!
Një fustan gjigant në ngjyrë kremi, i mbuluar me detaje lulesh të argjendta dhe gold! Që nga posteri, ku aktorja në rolin e princeshës shfaqet me kokën e përkulur, dallohet që personazhi është epitoma e hijëshisë dhe pikëllimit dhe fustani është dizenjuar në harmoni të plotë me subjektin.
Jo më kot mori gjithë vëmendjen e internetit, pasi fustani i princeshës s’është një fustan i thjeshtë, por vepër arti për të cilën u deshën rreth 1000 orë punë! Sipas Vogue Paris, krijimi është punë e Chanel dhe në total për ta ndërtuar u deshën 1054 orë. Delikat, në ngjyrë bezhë dhe i ndërthurur me detaje gold dhe argjend, eleganca e fustanit qëndronte tek kujdesi i treguar tek krijimi i bustit.
Referuar Vogue, fustani është rikrijim i koleksionit pranverë-verë të 1988 dhe është ridizenjuar vetëm për filmin. Jo pa qëllim produksioni zgjodhi të bashkëpunonte me Chanel. Duke ditur që Kristen që prej 2013-it ka qenë ambasadore e markës, dihej që rezultati i prodhuar do të ishte sukses.
Pritet që filmi “Spencer” të shfaqet në kinema prej 5 nëntorit.
