Kryeministri i Shqipërisë Edi Rama i është përgjigjur Ilir Metës për letrën e këtij të fundit me 11 pyetje për situatën e COVID-19 dhe masat.
Rama i kërkon Metës mos ndërhyjë në punët e ekspertëve por të vendosë vetë maskën si dhe të mbledhë LSI-në që mos bëjë thirrje kundër kësaj mase.
Në fakt letra e Metës ishte për Ministren e Shëndetësisë, Ogerta Manastirliu si kërkesë informacioni për masat që do të ndërmerren në bazë të strategjisë vjeshtë-dimër. Rama e siguron se ekspertët janë ata që do i ndërmarrin hapat teksa shton se rritja e shifrave të COVID-19 ishte e parashikuar.
Ai shton se Ogerta Manastirliu meriton përkrahje pa rezervë për punën e palodhur bashkë me ekspertët, mjekët dhe infermierët.
STATUSI NGA EDI RAMA
Ilir ti s’ke asnjë kompetencë të fusësh hundët në punët e ekspertëve për menaxhimin e situatës mjekësore! Si fillim mos dil vetë pa maskë nga shtëpia,mblidh edhe partinë tënde që të mos bëjë thirrje histerike kundër maskës dhe shiko punën që ke se vetëm atë s’po bën prej kohësh!
Ekspertët janë ata që vendosin për hapat që duhen ndërmarrë çdo ditë në bazë të strategjisë së vjeshtë-dimrit.Rritja e numrave është brenda parashikimeve dhe ne duhet të shmangim me çdo kusht një mbyllje të re, prandaj secili, ti i pari, duhet të zbatojë rregullat e thjeshta!
Ministrja e Shëndetësisë meriton përkrahje pa rezervë për punën e palodhur që po bën, siç e meritojnë ekspertët dhe padiskutim mjekët e infermierët që po shkëlqejnë prej muajsh në këtë luftë, ku e tërë bota po vuan nga të njëjtat probleme e dilema të mëdha vendim-marrëse!
