Kryeministri Rama, përmes një postimi të gjatë, u është përgjigjur të gjithë kritikëve të cilët më së shumti i shkruajnë atij në rrjetet sociale, këtë herë në lidhje me ujin e pijshëm dhe kanalizimet. Keni të drejtë shkruan kryeministri Rama, kur thoni se në 2020 ne ende diskutojmë për ujin, por në 25 sipas tij, nuk është vënë dorë në këtë sektor.
“Me plot të drejtë shumëkush në këtë faqe, po edhe në përgjithësi, kur vjen fjala për ujin e pijshëm e kanalizimet, thotë po si ka mundësi akoma diskutohet uji në këtë vend(?) dhe pastaj, “normal”, nuk mungojnë përqeshësit e sharësit, që kanë si biçim zanati të dytë të hapin frëngjinë e fejsbukut në ajfon dhe nga kafeneja, plazhi apo fundi i botës, të shfryjnë zeherin kur shohin një postim për këtë temë!
Mirëpo, e para, ndër plot kusuret e mia, nuk hyn dot edhe kusuri për çfarë nuk u bë apo më keq akoma, u bë së prapthi në 25 vjet me radhë, si në çdo sektor edhe në sektorin e ujit. Imagjinojeni pak që nga viti 1992 në vitin 2013, u hartuan plot 23 strategji kombëtare për sektorin e ujit(!!!) dhe 78 dokumenta strategjikë për zhvillimin e sektorit!!! Miliona e miliona të harxhuara për një lumë të tërë letrash, nga qeveritë, bashkitë e sidomos donatorët e huaj, në një shtet rrumpallë, ku siç e tregojnë vetë këto shifra të frikshme strategjish, s’e merrte vesh i pari të dytin. Nga ana tjetër, u harxhuan edhe qindra milionë në çerekun e parë të shekullit të parë të demokracisë, për investime po aq të kuturueshme sa edhe studimet në fjalë, me një rezultat mizerabël për popullatën e vendit të dytë më të pasur me ujë në Europë. Në këtë faqe, do t’ju informojmë më tutje për ku e gjetëm faktikisht këtë sektor e çfarë kemi bërë e do të bëjmë më tutje, por për sot po ndalem këtu”.
Më tej Rama shprehet se një ndër sfidat e qeverisë sot, është të rindërtosh aty ku është ndërtuar një herë, siç po ndodh edhe për kanalizimet. Përmes një video ku shfaqe Vlora e transformuar, Rama shprehet i lumtur që ky qytet ashtu edhe Durrësi, nuk do të kenë më rrjedhje ujërash të zeza në bregdet.
Dhe këtu vjen e dyta. Të ndërtosh nga e para është një sfidë e madhe, po të rindërtosh aty ku është ndërtuar së prapthi më parë, është një hall më vete. Na është dashur një punë e dhjetëfishtë, për të risistemuar bazën e nisjes dhe për t’i bërë për së mbari gjërat, duke rivendosur prioritetet, kryer analizat, bërë studimet, reformuar sektorin (që duhet reformuar ende më tej), shkruar e miratuar ligjet, aktet nënligjore, projektet e me radhë. Sot kemi nxjerrë sapo kokën mbi ujë kur i thonë fjalës dhe presim rezultatet domethënëse të shumë kantiereve të furnizimit me ujë të pijshëm, ku po punohet në tërë Shqipërinë – larg syve të medias përgjithësisht, sepse ndryshe nga rrugët, shkollat, spitalet, e të tjera, punimet e infrastrukturës nëntokësore janë më pak të dukshme, por edhe ne vetë s’u kemi bërë sa duhet hyzmetin në funksion të informimit të publikut. Kaq për sot.
Videoja bashkëngjitur flet shumë për sa më lart, sepse duket e pabesueshme por është një e vërtetë e dhimbshme, që një destinacion turistik si Vlora, me një potencial të madh ekonomik e punësimi, jo thjesht për qytetin, po në rang kombëtar, të derdhë në detin e qytetit ujërat e zeza e askush të mos e verë ujin në zjarr për çerekshekulli e kusur. Pasi kemi kryer studimin, bërë projektin, gjetur financimin (një fjalë goje me tërë ato borxhe që na u desh të shlyejmë në mandatin e parë, e tërë ato gropa nga të katër anët, në çdo sektor, që vazhdojmë mbushim), jam i lehtësuar nga fakti se më në fund edhe Vlora, njësoj si Durrësi tanimë, s’do ketë më rrjedhje ujëra të zezash në bregdetin e saj të mrekullueshëm, ku impakti ekonomik i Lungomares do të vazhdojë të rritet e ku, pas disa ndërhyrjesh të reja aty e përreth, për të rritur kapacitetet e cilësinë e hotelerisë, do të kemi një qytet turistik në rangun e parë të qyteteve të madhësisë së ngjashme në Mesdhe”, shkruan Rama.
