Sara Hoxha po provon një tjetër dimension të televizionit. Pas eksperiencave të saj si konkurrente, anëtare jurie dhe aktore, këtë herë ajo kalon në rolin e moderatores, duke marrë drejtimin e një rubrike të sajën në Top Channel.
Duke nisur nga e diela, 20 shtator, Sara do të moderojë “Me Gjithë Zemër”, rubrikën më të re të programit “E Diell”, të ndërtuar rreth historive personale, surprizave dhe emocioneve.
Formati synon të sjellë në ekran histori të njerëzve të zakonshëm, ndërsa një element i rëndësishëm është përfshirja e drejtpërdrejtë e publikut. Shikuesit mund të propozojnë vetë historitë që dëshirojnë të realizohen në program.
Një falënderim që nuk është thënë kurrë, një kërkim faljeje, një propozim martese apo një surprizë për një person të rëndësishëm janë vetëm disa prej situatave që mund të shndërrohen në pjesë të “Me Gjithë Zemër”.
Për Sarën, ky është një rol ndryshe nga ato me të cilat publiku është mësuar ta shohë deri tani. Për herë të parë ajo do të jetë personi që udhëheq rrëfimin dhe emocionet e të tjerëve, duke kaluar nga protagoniste e ekranit në drejtuese të historive që vijnë nga publiku.
Rubrika do të ketë premierën më 20 shtator në Top Channel, si pjesë e programit të së dielës “E Diell”.
