Burak Ozcivit dhe Fahriye Evcen erdhën në ekranin e Tring me serialit «Lovebird-Trumcaku». Ata na njohën me historinë e Ferides dhe Kamranit, kryeveprën e letësisë turke. Megjithatë, ky serial përfundon dhe më datë 28 dhjetor vjen në Jolly HD “Zonja Fazilet dhe të bijat”.
Ky është një nga serialet më të pëlqyer në Turqi, prodhim i vitit 2017. Zonja Fazilet dhe të bijat bëjnë një jetë modeste, por ëndrra e zjarrtë që një ditë të bëhet e pasur nuk është shuar asnjëherë. Pas vdekjes së të shoqit, jeta në një shtëpi të vogël dhe mjerane ishte e vështirë për të tria. Exhe, vajza më e vogël, ndan të njëjtën ëndërr me të ëmën, ndërsa Hazan me një personalitet krejt tjetër vazhdon të vuajë për mungesën e të atit.
Duke besuar se një ditë do të bëhet e famshme, Fazileti përdor Exhenë për të realizuar ëndrrat e saj e duket se shënjestra e tyre është familja Egemen. Jeta luksoze e tyre dhe përpjekjet për t’u bërë pjesë e saj do të ndryshojnë gjithmonë jetën e Exhesë dhe Hazanit. Sinani, djali më i vogël i familjes do të shndërrohet në mollën e sherrit mes dy motrave.
