Ditën e djeshme, Komisioni i Ekonomisë dhe Financave i kërkoi qeverisë që të aprovonte një marrëveshje të re me Fondin Monetar Ndërkombëtar, për shkak të situatës ekonomike të krijuar nga pandemia e COVID-19.
Anastas Angjeli, deputeti i Partisë Socialiste, njëkohësisht dhe sekretar i Komisionit, tha se duhet të merret në konsideratë një marrëveshje të re me FMN për të menaxhuar më mirë financat publike, pas goditjes nga tërmeti dhe koronavirusit pasi kanë lënë dëme të mëdha.
Në mbledhjen e Komisionit të Ekonomisë, u miratua marrëveshja e akordimit të huasë nga FMN me vlerë 190 mln dollar nëpërmjet financimit të shpejtë.
“Në situatën që ndodhemi sot, Shqipëria ka marrëveshje sipas artikullit 4 me FMN. Por duke parë situatën ekonomike, dhe veçanërisht ajo e financave publike, për arsye që janë jo të faktorit të brendshëm ekonomik, por të faktorit të jashtëm, siç është fatkeqësia natyrore e tërmetit, si dhe ajo e pandemisë, por edhe duke bërë vlerësimin e deritanishëm të gjendjes ekonomike dhe financave publike, mbase ka ardhur koha që paralelisht me atë që ministrja theksoi që në muajin qershor do të kemi një vlerësim të situatës dhe rialokim të fondeve buxhetore, të mendohet për një marrëveshje të re me FMN. Ajo që pritet këtë vit së paku, dhe hapësirës fiskale shumë të ngushtë që do të ketë për vitin e ardhshëm, ndoshta menaxhimi më i mirë i financave publike dhe i situatës në vend do të kishte si mbështetje një marrëveshje të re me Fondin Monetar Ndërkombëtar”, u shpreh Angjeli.
