Raporti i fundit mujor i kompanisë “Check Point Software Technologies” tregon se, vendet më të rrezikuara në Europë nga sulmet kibernetike janë Maqedonia, Gjeorgjia dhe Shqipëria.
Në listë, pas tyre vijnë Rusia, Rumania dhe Polonia, ndërsa më e ulët, rrezikshmëria e goditjeve të tilla llogaritet të jetë në Islandë e Luksemburg.
Sipas “Check Point”, deri në 25% e rrjeteve të korporatave në mbarë globin janë infektuar nga dy grupe virusesh, “Fireball” dhe “WannaCry”, të konsideruar si dy prej aplikacioneve të dëmshme më të përhapura nëpër botë.
Ndërkohë, lëshimi i virusit “Petya” të martën kishte – sipas “EUROPOL”-it – ngjashmëri me sulmin e mëparshëm kibernetik përmes “WannaCry”, por me “aftësi më të sofistikuara goditëse që synojnë shfrytëzimin e një vargu dobësish”.
Sulmi i muajit maj bëri që spitalet britanike të devijonin ambulancat dhe të anulonin operacionet. Ekspertët arritën më në fund ta gjenin një mënyrë për të zhbllokuar situatën, por ndërkohë, rreth 300 persona e paguan shumën e kërkuar për lirimin e sistemeve të tyre kompjuterike.
Episodi i së martës shkaktoi probleme në 64 vende, përfshirë kompaninë farmaceutike amerikane “Merck”, gjigantin rus të naftës “Rosneft”, kompaninë britanike të reklamave “WPP” dhe grupimin industrial francez “Saint Gobain”.
Prej tij, edhe porti më i madh i Indisë për kontenierët ndërpreu punën, duke i shkaktuar probleme vendeve dhe bizneseve të prekura. I ashtuquajturi “virus pengmarrës” bllokon sistemet kompjuterike derisa viktimat të paguajnë një shumë të caktuar parash.