Dita e Rinisë në kryeqytet u festua me një park të ri.
Dhjetë përfaqësues të organizatave të ndryshme në vend iu bashkuan nismës së Bashkisë së Tiranës për të mbjellë pemë të reja në pjesën lindore të Liqenit të Farkës në atë që tashmë do të cilësohet si “Parku Studenti”.
Kryetari i Bashkisë Erion Veliaj theksoi rëndësinë e politikave të tilla transformuese dhe shprehu mirënjohjen organizatave për përkrahjen e nismave të tilla. “E filluam mbarë duke mbjellë disa pemë, në atë që ne do ta quajmë “Kopshti i rinisë”. Është në pjesën lindore të Liqenit të Farkës, në një zonë ku sapo e kemi filluar mbjelljen dhe sapo kemi filluar pyllëzimin dhe besoj që si shumë ide rinore dhe studentësh që fillojnë me idealizëm, fillojnë në kushte modeste, por pastaj mund të ndryshojnë botën. Kush e mendonte përpara 30 vitesh që ajo lëvizje rinore do transformonte Shqipërinë, kush e mendonte përpara 2 vitesh që një gocë 16-vjeç Greta Thunberg do transformonte të gjithë politikat mjedisore të botës, edhe shpalljen e emergjencës mjedisore”, u shpreh Veliaj.
Ai nënvizoi se pandemia na tregoi se sa rëndësi ka mjedisi, teksa shtoi se beteja nuk është me njëri-tjetrin, por me pandeminë, tërmetin e me natyrën.
“Siç kuptuam nga pandemia, disa gjëra që ne i merrnim për të mirëqena, u bë gjëja më e përfolur. Pamë një Tiranë që u pastrua në ditët që ishim në karantinë, pa makina. Do të thotë që ndotjen ose pastërtinë e paskemi vetë në dorë. Besoj që 30 vite nga dita e parë e rinisë dhe gjithë lëvizja studentore, një gjë duhet të kuptojmë të gjithë, ne nuk kemi betejë me njëri-tjetrin, por me pandeminë, tërmetin, me natyrën në kuptimin e mirë të fjalës. Të përballemi me përmbytjet, thatësirat, me gjithë ndryshimet klimaterike. Këto janë betejat tona. Betejat me njëri-tjetrin janë një humbje spektakolare kohe”, vijoi Veliaj.
Duke folur për rëndësinë e mjedisit, kryebashkiaku tha se një rast suksesi ishte ai i Liqenit Artificial të Tiranës, ku nga një hapësirë e zaptuar, tashmë është kthyer në një zonë të gjelbëruar të preferuar nga të gjithë. “Nëse ata që në vitet ’90 ishin në moshë studentore dhe mund të them me krenari që kontribuuan për transformimin e vendit, do të doja që ne të ishim gjenerata që të thoshim, ishim brezi që bëmë paqe me natyrën. Ishim një brez që e ktheu Shqipërinë por sidomos Tiranën, ku jeton gjysma e Shqipërisë, në një binar dhe në një armëpushim kur vjen puna tek trajtimi i natyrës”, deklaroi Veliaj.
Me rastin e Ditës së Rinisë, Bashkia e Tiranës ka planifikuar një sërë aktivitetesh në përputhje dhe më të gjithë masat anti-Covid të Komitetit Teknik të Ekspertëve.
