Është folur dhe shkruar shumë se do të ketë një rubrikë në programin “E diell” që do të thyejë tabu dhe do të sjellë tjetër lloj spektakli tek publiku shqiptar. Bëhet fjalë për “PërPuthen”, rubrikën ku dy vajza do të njihen me djem të ndryshëm konkurrentë dhe në fund të sezonit do të përzgjedhin edhe mashkullin e tyre ideal.
Nëse jeni të njohur me programin italian “Uomini e Donne” me siguri e kuptoni lehtë edhe formulën e “Perputhen” pasi është një version i të njëjtës strukturë, tejet të suksesshme në Itali dhe vjen tashmë në Top Channel për të sfiduar mentalitetin shqiptar si dhe për të dhuruar show argëtues.
“Përputhen” na ka njohur deri më tani me dy vajzat të cilat do të dalin në njohje me djemtë konkurrentë dhe ato janë Antonela Koçi dhe Ina Kollcaku. Ndërkohë surprizë mbeten ende djemtë që kanë aplikuar për t’u njohur me vajzat si dhe mënyra se si do të zhvillohet e gjithë rubrika.
E megjithatë, ka edhe një tjetër surprizë që neve na pëlqeu shumë!
Edi Manushi, moderator i “E diell” dhe autorja e programit Olsa Muhameti, kanë menduar që ky format nuk do të kishte kuptim pa një opinionist i cili do t’i japë tjetër dinamikë ngjarjeve në “Përputhen”. Ata kanë zgjedhur dhe kanë këmbëngulur pikërisht për Olti Currin, i cili jo vetëm njihet për opinionet e tij të drejtpërdrejta e që shkaktojnë më pas zhurmë në rrjet, por është edhe një nga njohësit më të mirë të televizionit italian.
Me siguri, e keni parë se sa shpesh ai poston në rrjete sociale komente të ndryshme lidhur me programacionin italian dhe programin, “Uomini e Donne”, ndaj Olti Curri do të ndajë tashmë të gjithë bagazhin e fituar, në këtë version shqiptar të rubrikës ku vajzat njohin djemtë, duke sjellë tek publiku një stil italian të të bërit televizion.
Duke dashur të mbesë autentik dhe i veçantë, titullin e rubrikës “Përputhen”, Olti Curri e ka pagëzuar me një tjetër emër që e shohim tashmë ta vendosë edhe si ‘hashtag’ në postimet nga emisioni. “Çifti i lumtur” – shkruan Curri duke bërë një analogji me shumë humor lidhur me filmin e njohur të Kinostudios.
Pritshmëritë janë të larta për këtë rubrikë të re që kthen edhe Olti Currin në Top Channel pas një eksperience mjaft të mirë që ai pati si autor dhe opinionist i “Big Brother Fun Club”. Tashmë që ‘panorama’ e “Përputhen” u plotësua edhe me emrin e tij, jemi gjithë sy e vesh për tu njohur me formatin dhe historitë që do të lindin nga njohjet atje…/News31.al