Kur kuzhina tradicionale Piemonteze takon shijet mesdhetare të Durrësit
Veri Shaqja: Kur kuzhina tradicionale Piemonteze takon shijet mesdhetare të Durrësit, rezultati është një kuzhinë e shijshme dhe inovative me një shije befasuese e origjinale.
Kështu fillon artikulli publikuar në gazetën e qytetit të Astit “La Nuova Provincia ” përgatitur nga gazetarja Lucia Pignari.
Është ajo që po ndodh në “Gener Neuv” në rrugën Carlo Leone Grandi të Astit të Italisë, ku që prej një viti po punon shefi Veri Shaqja.
Me origjinë shqiptare, e prej 12 vitesh në Itali, ky kuzhinier i ri 29-vjeçar tashmë ka mbi supe një kurrikulum për t’u patur zili kur dy vite më parë u nderua në kronikat e gazetave kur doli i treti në edicionin televiziv “Masterchef Albania”.
Sot, Veri Shaqja, me vendosmëri dhe pasion drejton kuzhinën e një prej restoranteve më të famshëm dhe të bukur në Asti, me mbi 40 vjet histori.
Rishikimi i recetave tradicionale
Me ndryshimin e menaxhimit në Gener Neuv, ky djalë kishte barrën dhe nderin e marrjes së recetave nga Pina Fassi, ruajtur, por edhe duke i rishikuar.
“Sepse, klientela jonë po kërkon një kuzhinë tipike Piemonteze, por me disa risi”, thotë Veri, të cilit titulli i “shefit” i rëndon.
“Preferoj të quhem përgjegjës, kam ende shumë për të mësuar,” shpjegon me përulësi dhe me një buzëqeshje që i ndriçon sytë.
Pasi arriti në Itali në moshën 17 vjeç, filloi karrierën e tij në restorantin “Osteria Boccalatte” në Vercelli, nën drejtimin e kuzhinierit Roberto Balgisi, sot përgjegjës për Grand Hotel në Alassio.
“Pata fatin të takohem me një mjeshtër të mirë”, shpjegon Veri, “i cili më ka përcjellë pasionin për këtë punë dhe më ka shtyrë të zbuloj botën, të jem kurioz dhe të ekperimentoj shije të reja”.
Në vitin 2006 në Canale d’Alba
Në vitin 2006, i riu Veri transferohet në Villa Tiboldi në Canale d’Alba. “Gjatë këtyre viteve jam përpjekur të fitoj teknikën italiane pa harruar origjinën time”, thotë Veri, i cili, për disa prej krijimeve të tij, propozon shijet e tokës së tij.
Veri Shaqja: “Shijet e fëmijërisë sime”
Ashtu si ëmbëlsira pagëzuar nga Veri “Era dhe shijet e fëmijërisë sime”. Bëhet fjalë për manin me shije agrodolce, me shurup petalesh, sfera çokollate të errët dhe thërrime limoni.
“Mbaj mend akoma verëra të kaluara në Durrës kur isha fëmijë, si ngjitesha kodrave që shtriheshin në det për të mbledhur kokrat e manaferrave”, na tregon me nostalgji.
Për të, kthimi në vendlindje, mbetet një ëndërr pa një datë të caktuar. “Në Shqipëri ka vështirësi në kuptimin e pjatave të përpunuara shumë dhe në përgjithësi nuk ecin. Ndërkohë, unë kam nevojë për sfida të vazhdueshme, më pëlqen të krijoj dhe për këtë arsye Italia është vendi për të jetuar “, na tregon me mirëbesim kuzhinieri.
Mendja e tij, e gjallë dhe vullkanike, ka prodhuar tashmë kombinime të shijshme që përziejnë njohuritë e fituara gjatë viteve, siç është rizoto me karkalec të kuq të Mazzara del Vallo, apo “sfungjer” i specave Carmagnola dhe salcë me ton të kombinuar me sfera të vogla djath dhie nga Alta Langa me borzilok.
“Kjo është një ‘hyrje’ fillestare, ku përdor produktet piemonteze si lëndë e parë, prodhuar nga vendasit duke respektuar territorin.
Suksesi i pjatave
“Më pëlqen puna ime dhe dua që pjatat e mia të kenë sukses. Kjo është arsyeja pse zakonisht dal në sallë dhe flas me klientët, u shpjegoj si krijohen pjatat në mënyrë që të marr komplimentet, por mbi të gjitha kritikat, gjithmonë të pranuara dhe konstruktive”.
Një punë që Veri kryen me përkushtim dhe entuziazëm.
Me siguri një shembull i mirë për shumë djem e vajza që kanë mbaruar shkollën e mesme në këtë periudhë dhe po kërkojnë rrugën e tyre.
Profesioni i kuzhinierit nuk mund të konsiderohet i thjeshtë, sidomos kur në kohën e drekës urdhërat mbivendosen dhe kuzhina transformohet në një gropë ku duhet të dini se si të manovroni siç duhet.
Publikuar ne Albania News
