TikTok-u është një nga aplikacionet në të përdorura sidomos nga të rinjtë dhe po fiton çdo ditë e më shumë përdorues. Videot që serviren në këtë rrjet social janë nga më të ndryshmet dhe shpesh bëhen virale. Por, një video për TikTok mund të të sjellë edhe probleme. Siç ka ndodhur me një 21-vjeçare në Tiranë e cila ditën e djeshme u procedua penalisht. Kjo pasi bashkë me shoqet e saj bllokoi rrugën në Unazën e Re për të bërë një video në Tik-Tok.
Ato shfaqen në autostradë teksa ndalojnë Benzin luksos me muzikë të lartë në sfond, zbresin dhe hapin një shishe shampanje, duke bllokuar autostradën. Nga ana tjetër drejtuesit e mjeteve iu bien borieve, pasi bllokohen në trafik. E gjithë videoja është realizuar nga vajzat përmes një droni.
Policia e Shtetit njoftoi se 21-vjeçarja, me inicialet V.D., banuese në Tiranë pas kontrolleve ka rezultuar edhe e papajisur me leje drejtimi. E reja e cila drejtonte mjetin “Mercedes Benz” me ngjyrë të bardhë, është gjobitur me 50.000 lekë të rinj, ndërsa mjeti u sekuestrua në cilësinë e provës materiale.
