Tetë pacientë me COVID-19 humbën jetën 24 orët e fundit në Shqipëri, ndërkohë që 410 persona të tjerë rezultuan pozitivë nga mbi 2 mijë testime që u kryen në autoritetet publike dhe private.
Viktimat ishin të moshave 64, 65, 67, 68, 74, 76, 76 dhe 80 vjeç nga Tirana, Elbasani, Fieri, Kavaja, Kurbini dhe Kuçova.
Kështu totali i viktimave në Shqipëri nga COVID-19 ka shkuar në 598 (2.28% e totalit të rasteve).
Autoritetet thanë se ditën e fundit u kryen 2,044 teste – në laboratorë publikë dhe privatë, 485 teste “për arsye depistimi (kontrolli)”, – prej së cilave rezultuan pozitivë 410 persona (pozitiviteti 26.3%).
Me rastet e reja totali ka shkuar në 26,211 persona, të cilët janë infektuar në Shqipëri prej muajit mars.
Të paktën 81 persona u deklaruan së fundmi të shëruar sipas ministrisë së Shëndetësisë, duke e çuar totalin në 12,574 persona (47.9% e rasteve totale) që kanë mundur ta mposhtin infeksionin që prej muajit mars.
Prej së hënës numri i personave të shëruar është më i vogël se numri i rasteve aktive.
Aktualisht të paktën 13,039 persona (49.7% e rasteve totale) mbeten ende mbartës të virusit, prej tyre 373 ndodhen të shtruar në spitale – 17 në terapi intensive.
Tirana (6,461 raste), Durrësi (1,113 raste) dhe Fieri (979 raste) janë qarqet më problematike për sa i përket pandemisë.