Andri Xhahu: “Elhaida Dani është një potencial. Fitorja! Gjithçka është e mundur…”

Eurovision Song Contest, kompeticioni muzikor më i rëndësishëm i muzikës europiane, këte vit është një nga më të lakuarit në median shqiptare dhe më i shumëprituri nga të gjithë shqiptarët kudo anembanë. E gjithë vemendja është fokusuar tek përfaqësuesja e Shqipërise Elhaida Dani dhe kënga e saj “I’m Alive”, një këngë që rrëbeu dëgjimin e parë zemrat e të gjithëve, edhe atyre më skeptikeve. E ndërkaq kënga vazhdon të shënojë rekorde si asnjëhere tjetër në klikime, sondazhe dhe kritika duke bërë jehonë kudo ku po dëgjohet. Ne kemi takuar atë që prej katër vitesh komenton në ekranin e RTSH Eurovision Song Contest dhe njëkohësiht imazhin e Shqipërisë në prezantimin e pikëve, gazetarin dhe moderatorin Andri Xhahu për të na treguar se si e sheh ai përfaqësimin e Shqipërisë këtë vit me Elhaida Danin.

Jeni konfirmuar për të katërtin vit si komentator dhe përfaqësues i RTSH për prezantimin e votave në Eurvision. Sa e rëndësishme është për ju kjo eksperiencë televizive?

Ndihem me fat që drejtuesit e RTSH-së ma besuan mua edhe këtë vit përcjelljen në shqip të Eurovision-it tek të gjithë shqiptarët dhe të jem njëherësh zëri i votuesve shqiptarë për këngën më të mirë të Eurovision Song Contest. Ky është viti im i katërt që e komentoj përmes ekranit të televizionit dhe viti i 11-të që përcjell tek dëgjuesi i Radio Tiranës gjithë sa i takon kësaj ngjarjeje të madhe muzikore. Kjo tregon se sa e rëndësishme është për mua kjo përvojë që ndërlidhet me dashurinë që kam që në krye të herës me Eurovision-in.

Si e sheh Andri përfaqësimin e Shqiperisë në Eurosong me Elhaida Dani në garë?

Para pak ditësh në instagram postova një foto ku shkruaja: Eurovision Song Contest, Tirana 2016. Besoj fort që do kemi një prezantim dinjitoz. Përtej sondazheve dhe votimeve paraprake, mendoj dhe shpresoj te një prezantim siç i ka hije Shqipërisë. Elhaida Dani është një potencial.

Më mirë “Diell” apo “I’m Alive”?

Edhe pse “Diell” u duk se nuk u përqafua menjëherë nga publiku, mendoj se secila nga këngët ka veçantinë e vet dhe si e tillë nuk mund të bëj dot një dallim. Por besoj tek shija e publikut.

Nëse do të fitonim këtë vit me “I’m Alive”, a mendoni se Shqipëria është gati për të mirëpritur një kompeticion si Eurovision Song Contest?

Në këtë rast nuk ka vend për “nëse”. Ne do fitojmë! Përtej shakasë… Kënga është shumë e mirë, Elhaida është e jashtëzakonshme në interpretim live, Radio Televizioni Shqiptar po bën maksimumin për promovimin e këngës, kështu që fitorja nuk është çudi. Shumë njerëz më pyesin se ku do mbahet eventi nëse fitojmë. Nuk besoj se nuk e kemi fituar Eurosong-un se nuk kemi patur ambientin apo infrastrukturën e duhur. Gjithçka është e mundur…

Jeni komentator edhe i festivalit të Sanremos. Cili festival është i preferuari juaj?

Të dyja ngjarjet muzikore janë të rëndësishme dhe secila është ndryshe nga njëra-tjetra. Kur diçka e marrë përsipër, e çoj deri në fund duke dhënë maksimumin. Diferencën e bën dashuria. Në këtë rast duket se Eurovision-i ma ka rrëmbyer zemrën pak më tepër dhe më herët.

Vitin e e kaluar keni drejtuar në RTSH emisionin “Gjithçka Shqip”. Eshtë në planet tuaja rikthimi në televizion?

“Gjithçka Shqip” prej një dekade vjen te dëgjuesi i dy frekuencave të Radio Tiranës për çdo ditë me prurjet më të fundit nga muzika shqiptare dhe protagonistë në studio. Një kohë, u hodh ideja për ta ekranizuar dhe për një sezon erdhi në ekranin e TVSH dhe RTSH Muzikë. Ishim të pavendosur për një sezon të dytë, por sondazhi juaj IMA AWARDS, për çmimet e televizionit, po na e ndryshon mendjen. Duke parë se sa mirë ka ecur “Gjithçka Shqip” me votat, i detyrohemi miqëve të këtij emisioni një sezon të dytë. Ende në bisedime, asgjë konkrete. Me kohë do j’ua bëjmë me dije.

Intervistoi N. Lako

REKLAMA
loading...

KOMENTO

This site uses Akismet to reduce spam. Learn how your comment data is processed.