Pas fotos që qarkulloi nëpër rrjete sociale, e cila krahasonte logon e re të Teatrit Kombëtar të Operas, Baletit dhe Ansamblit Popullor (TKOBAP) me një logo të publikuar katër vite më parë në Freepik.com, TKOBAP u shpreh: “Në pamje të parë vërehet një ngjashmëri e madhe me logon e re të TKOBAP, çka me të drejtë ngre dyshime të arsyeshme për një plagjiaturë. Për këtë arsye po shpjegojmë më poshtë kontekstin dhe rrjedhën e procesit në të cilin TKOBAP është angazhuar për këtë projekt, si edhe masat që pritet të ndërmerren në lidhje me këtë rast.”
Në lidhje me çmimin për fituesin e konkursit, 1,845,000 lekë, TKOBAP thotë:
“Në kuadrin e përurimit të rikonstruksionit të TKOBAP dhe rinovimit të imazhit të tij, më datë 20.11,2019, TKOBAP shpalli konkursin për krijimin e brand-it të ri, “Newbrand & Brandbook & Videokoncept i Newbrandi-it me fondin prej 1,537,500 lekë (1,845,000 lekë përfshirë TVSH-në), i cili doli si rezultat i ofertave të marra nga disa prej kompanive të marketingut në vend. Në kuadër të ketij konkursi, aplikantët duhet të dorezonin jo vetëm një logo, por një set produktesh marketingu si më poshtë:
– Koncepti dhe ideja e logos së re zyrtare të TKOBAP;
– Spot videokonceptual për Brand-in e TKOBAP;
– Sigla e identifikimit të TKOBAP-së, (audio&video) me të cilën kuptohet pjesa muzikore (e pa kënduar) e shoqëruar me pjesë vizuale, me kohëzgjatje të caktuar 15 sekonda;
– Sinjalistikat e objektit te institucionit TKOBAP, indoor dhe outdoor;
– Dizajni dhe prezantimi i posterave dhe billboard-eve, biletave, veshjeve të personelit të biletarisë, punonjësve të sallës dhe të pritjes në hyrje, suvenireve, broshurave prezantuese, kartëvizitave, materialeve promocionale, ftesat, stemës së TKOBAP etj.
Në lidhje me kompanitë pjesëmarrëse:
“Në këtë konkurs morën pjesë 14 kompani të ndryshme prestigjoze, të cilat paraqitën punimet e tyre. Komisioni i vlerësimit përzgjodhi si kompani fituese kompanine Pika Pro sh.p.k, e cila sipas procedurës, vuri në dispozicion setin e lartpërmendur të produkteve të marketingut.”
TKOBAP nuk ka publikuar punimet e kompanive të tjera.
Në lidhje me mosverifikimin e logos:
“TKOBAP, ashtu si shumë institucione private dhe publike në vend dhe në botë, nuk ka kapacitetin dhe burime njerëzore të specializuara për të verifikuar origjinalitetin e një produkti marketingu siç është logoja. Plagjiaturat janë një realitet i hershëm i krijmtarisë botërore dhe është pikërisht për të zgjidhur situata të tilla, që mund të ndodhin rëndom dhe janë vështirësisht të evidentueshme në avancë, që çdo punim shoqërohet me anagazhime të forta mbi përgjegjësitë ligjore të origjinalitetit nga ana e autorëve. Prandaj, për të evituar këtë risk potencial, TKOBAP:
1. Ka përfshirë në kriteret e shpallura të këtij konkursi, pikën si vijon “…Punimet duhet të jenë origjinale, të papublikuara dhe autori duhet të pranojë përgjegjësi ligjore për sa i përket autenticitetit të punimeve të dorëzuara”, si edhe pikën si vijon “…Punimet dhe materialet do të dorëzohen të shoqëruara me një deklaratë autorësie si i vetmi zotërues dhe autor i tyre”. […]
3. Ka kërkuar dhe ka marrë nga ana e autorit, nënshkrimin e “Deklaratës së Autorsisë së New Brand-it të TKOBAP” nëpërmjet të cilës ky i fundit deklaron se të gjitha materialet që përbëjnë “New Brand-in” janë unike dhe krijimtari origjinale, të papublikuara dhe në pronë të agjensisë “Pika Pro” si autor i vetëm dhe posedues i të gjitha të drejtave ligjore që rrjedhin prej saj.”
Në lidhje me veprimet e mëtejshme:
“TKOBAP do të vendosë në funksion të gjithë mekanizmat ligjore dhe kontraktuale për adresimin juridik të këtij problemi, duke bërë përgjegjës autorin për të gjithë dëmin e shkaktuar, në rast se organet kompetente certifikojnë imazhin e logos së TKOBAP si plagjaturë.”
Reagimet e njerëzve
Nëpër komente, të shumtë janë njerëzit që theksojnë se nuk kërkon shumë njohuri për të kuptuar se kopja nuk është e ngjashme, sepse është identike. Të tjerë ironizojnë atë që TKOBAP e cilëson si “mungesë kapaciteti për të vërtetuar origjinalitetin e logos”.