Këngëtarja e njohur Elhaida Dani do të rikthehet sërish në rolin e drejtueses artistike të Festivalit të Këngës në Radiotelevizionin Shqiptar. Pasi drejtoi edicionin e 63-të të festivalit, Elhaida konfirmon përmes një videoje në rrjetet sociale se do të mbajë këtë pozicion edhe për edicionin e 64-t.
“Drejtoresha artistike e Festivalit të 64 jam përsëri unë me stafin tim. Jam këtu për të dhënë një mesazh për artistët, ata të rinj që janë e ardhmja e tregut muzikor shqiptar: mos e injoroni inspirimin, uluni, shkruani, bëni gjëra me zemër, gjëra shqiptare,” – shprehet Elhaida në video, duke ftuar artistët të nisin përgatitjet për pjesëmarrje.
Elhaida Dani është një nga artistet më të suksesshme të skenës shqiptare. Ajo ka fituar një sërë çmimesh të rëndësishme që në fillimet e karrierës së saj: nga fitorja në talent show-n Star Academy në vitin 2009, te çmimi i parë në Top Fest 2012, dhe më pas fituese e Festivalit të Këngës në RTSH në 2014, përfaqësuese e Shqipërisë në Eurovision 2015 me këngën “I Am Alive”.
Karriera e saj njohu një tjetër kulm ndërkombëtar në 2013, kur Elhaida u shpall fituese e “The Voice of Italy”, duke fituar zemrat e publikut italian nën mentorimin e kantautorit të njohur Riccardo Cocciante. Pikërisht me Cocciante, ajo do të bashkëpunonte më pas në një nga produksionet më të rëndësishme ndërkombëtare – muzikali “Notre Dame de Paris”, ku Elhaida interpretoi rolin kryesor të Esmeraldës.
View this post on InstagramADVERTISEMENT
Përveç arritjeve të shumta skenike, Dani ka sjellë ndër vite një repertor të pasur muzikor që ka gjetur gjithmonë mbështetjen e publikut. Rikthimi i saj në krye të Festivalit të Këngës në RTSH pritet me shumë interes nga artistët dhe ndjekësit e muzikës shqiptare.
