Tiranë – Një takim i rëndësishëm u zhvillua sot mes komunitetit të kineastëve shqiptarë dhe drejtuesit të ri të Qendrës Kombëtare të Kinematografisë (QKK), ku u prezantua vizioni dhe hapat konkretë të strategjisë së re për zhvillimin e sektorit audiovizual në Shqipëri.
Ky takim shënoi një moment kyç për industrinë kreative, duke vendosur në qendër prioritete të tilla si transparenca, rritja e standardeve profesionale, si dhe nxitja e bashkëpunimeve ndërkombëtare në fushën e filmit dhe prodhimeve audiovizuale.
Në prani të përfaqësuesve të QKK-së dhe ekspertëve ndërkombëtarë të ftuar nga British Council, u prezantuan pikat kryesore të strategjisë së re, e ndërtuar mbi analizën e nevojave të tregut vendas dhe potencialit për bashkëprodhime ndërkombëtare.
U prezantua gjithashtu rregullorja e re e aplikimit në QKK, që synon të thjeshtojë procedurat burokratike, të rrisë aksesin për projekte cilësore dhe të krijojë më shumë hapësira për artistë të rinj dhe producentë të pavarur. Një tjetër pikë thelbësore ishte promovimi i mundësive konkrete që ofron Media Desk i Creative Europe, duke e bërë industrinë shqiptare më të përfshirë në rrjete dhe programe bashkëprodhimi evropiane.
Qasja gjithëpërfshirëse dhe partneritetet e qëndrueshme që synon kjo strategji e re, kanë për qëllim ndërtimin e një ekosistemi të fortë për krijimtarinë audiovizuale në Shqipëri – një sektor që përfaqëson jo vetëm trashëgiminë dhe identitetin tonë kulturor, por edhe bart potencial të rëndësishëm për zhvillim ekonomik dhe diplomaci kulturore.
