Pas një vale spekulimesh, akuzash dhe përhapjesh informacioni të pavërtetë në rrjetet sociale, këngëtarja e njohur shqiptare Parashqevi Simaku ka reaguar për herë të parë publikisht përmes një deklarate të ndjerë në llogaritë e saj zyrtare.
Artisja, e cila prej vitesh ka qenë e tërhequr nga jeta publike, thekson se ka marrë “mijëra mesazhe” nga ndjekësit që i kanë dërguar përmbajtje të manipuluara me teknologji artificiale, të cilat i cilëson si “plotësisht të rreme dhe pa asnjë lidhje me të vërtetën.”
“Nuk kam dashur kurrë të reagoj ndaj gënjeshtrave dhe sulmeve të padrejta që disa persona përpiqen t’i hedhin mbi imazhin tim. Por tashmë situata ka kaluar çdo kufi dhe nuk mund të hesht më”, shkruan Simaku, duke shtuar se do të jetë kjo hera e parë dhe e fundit që do të shprehet publikisht për këtë çështje.
“Historia ime është bërë publike, por ka gjëra personale që nuk do t’i zbuloj kurrë. Jam besimtare dhe besoj me gjithë zemër se Zoti do të bëjë drejtësinë e tij në kohën e duhur”, thekson këngëtarja në mesazhin e saj.
Me këtë reagim, Simaku ka zgjedhur të përballojë situatën me dinjitet dhe vendosmëri, duke theksuar se do të vijojë të qëndrojë “krenare dhe e fortë” përballë çdo sfide, falë mbështetjes së ndjekësve të saj besnikë.
Deklarata e saj ka ngjallur reagime të shumta në rrjet, ku shumë ndjekës dhe figura publike kanë shprehur solidaritet dhe mbështetje ndaj artistes së njohur.
