Fadromat e pushtetit nuk po kursejnë asgjë në Shqipëri, ndërsa Tirana është qyteti që po e vuan më shumë këtë fenomen.
Pas Teatrit Kombëtar, Kullës së Sahatit që po mbulohet nga përbindëshit prej betoni dhe pas shumë objekteve historikë që po i fshihen kryeqytetit, së fundmi i erdhi rradha edhe Maternitetit “Nëna Geraldinë”.
Ky objekt, me një histori gati 80 vjeçare dhe e konsideruar si një ndërtesat me karakteristike të kryeqytetit shqiptar, provoi fadromën mbi fasadën e saj, “monument kulture”.
Lidhur me këtë ngjarje, mes shumë të tjerëve, reagon edhe gazetarja Sonila Meço.
Teksa rëndit të gjjitha sulmet e kësaj mazhorance mbi objektet kult të kryeqytetit, autorja e emisionit “Tempora” shprehet ndër të tjera se, teoria “Historia fillon me mua” ka prodhuar një qytet monstër.
Reagimi i plotë:
-Materniteti shembet natën për t’u rikonstruktuar.
-Kulla e Sahatit rrethohet me rrokaqiej betoni, natë e ditë.
-Stadiumi Kombëtar “Qemal Stafa” shembet për një të ri me kullë betoni.
-Teatri Kombëtar shembet ndaj të gdhirë për një plan me kulla betoni.
-Veliera dëmton trashëgiminë arkeologjike në Durrës
-Muri rrethues i teqesë halvetiane shembet nga IMT e Bashkisë së Tiranës
-Kalaja e Tiranës pëson prekje të forta në identitet nga harku prej guri i portës së kalasë deri tek shtrimi me beton i sipërfaqes së tokës ngjitur me murin rrethues të kalasë, duke cënuar blloqet e gurit që e formojnë atë.
-Shembet Muzeu i Shkencave të Natyrës për të vendosur beton rrokaqiejsh. E të tjera e të tjera…Monumente kulture, të tëra…
Në rastin më të mirë po mbyt veprimtaria tregtare trashëgiminë kulturore e arkeologjike a thua se mbaruan terrenet e lira…Në rastin më të keq filozofia tabula rasa “Historia fillon me mua” prodhoi një qytet-monstër, ku të gjithë ndihemi jabanxhinj po aq sa punëtorët e huaj që po marrin punët që lënë shqiptarët e detyruar të emigrojnë.
Eksperiment i madh.
Një teori provohet nga një eksperiment, ama asnjë shteg nuk e çon eksperimentin tek lindja e një teorie.
Ndaj plani do jetë vendosur shumë herët.
