Aktiviteti ekonomik gjatë këtij viti ka pësuar rënie krahasuar me të njëjtën periudhë të vitit 2020. Treguesit fiskalë të publikuar nga Ministria e Financave dhe Ekonomisë flasin për një reduktim të konsumit dhe ulje të shitjeve, situatë e cila dëshmohet nga performanca e dobët e mbledhjes së tatimit mbi vlerën e shtuar.
Ndryshe nga pritshmëritë e qeverisë, TVSH-ja është ulur me 42 milionë Dollarë krahasuar me planin i cili parashikonte një rimëkëmbje të shpejtë të aktivitetit ekonomik këtë vit dhe 13 milionë Dollarë më pak se Shkurti i 2020-s.
Por pavarësisht kësaj situate, e cila reflekton edhe masat shtrënguese të marra për pandeminë e Covid-19, taksa të tjera të cilat janë tregues të investimeve private kanë patur ecuri të mirë. Akcizat janë mbledhur më shumë se plani, ndërsa taksat kombëtare ia kanë kaluar së njëjtës periudhë të vitit 2020.
Gjithashtu është rritur performanca e administratës për shpenzime për investime publike. Fondet e dhëna për vepra në infrastrukturë janë rritur me 90% krahasuar me 2020-n, por janë ulur shpenzimet për kompensimin e ish- pronarëve dhe të përndjekurve politikë.
Me performancë të dobët është edhe fondi i rindërtimit. Të dhënat e buxhetit dëshmojnë se në dy muajt Janar dhe Shkurt janë disbursuar 9 milionë Dollarë nga 21 milionë të destinuara për t’u paguar në këtë periudhë nga buxheti.
