Gjykata Penale e Tiranës rinis pas më shumë se dy dekadash procesin ndaj Izet Haxhisë, të dënuar për vrasjen e ish-deputetit të PD, Azem Hajdari, në vitin 1998.
Prokuroria kërkon thirrjen si dëshmitar të ish-kryeministrit Sali Berisha, të Jaho Mulosmanit, aktualisht i dënuar me burg përjetë për vrasjen e ish-deputetit Azem Hajdari.
Prokurori Dritan Nushi ka lexuar kërkesën për gjykim, duke listuar edhe dëshmitarët që duhen pyetur mes tyre ish-kryeministrin Sali Berisha, Vili Minarolli, Sali Lusha, Genc Pollo, e një sërë dëshmitarësh të tjerë. Vetë Haxhia s’ishte i pranishëm në këtë seancë, ndërsa më 2 tetor pritet që Gjykata të vendosë për dëshmitarët që do të pyeten.
Izet Haxhia u ekstradua pak vite më parë nga Turqia, ndërsa është akuzuar për përfshirje në vrasjen e Azem Hajdari. Me të ardhur në Shqipëri, Haxhia kërkoi rihapjen e procesit gjyqësor, kërkesë e cila u pranua nga gjykata. Izet Haxhia u arrestua në vitin 2006 në Turqi, por drejtësia turke nuk ishte shprehur ende për ekstradimin e tij, ndonëse pala shqiptare kishte bërë kërkesa të vazhdueshme. Për 12 vite me radhë gjykata turke kishte urdhëruar thjesht që ai të mos largohej jashtë vendit, ndërsa në shkurt të vitit 2018, befas u mor vendimi që ai të ekstradohet. Izet Haxhia është dënuar nga gjykata shqiptare me 25 vite burg për përfshirje në vrasjen e Azem Hajdarit, akuzë të cilën ai nuk e ka pranuar. /rtsh.al
