Duke nisur nga sot në gjashtë vende të Ballkanit Perëndimor ku përfshihet edhe Shqipëria, tarifa shtesë roaming është zero.
Nisma e Këshillit të Bashkëpunimit Rajonal “Fol si n’shpi” parashikon heqjen e tarifave roaming me pakicë, kur pajtimtarët e rrjeteve celulare të Shqipërisë të vizitojnë vendet e BP-së. Marrëveshja për reduktimin e çmimeve të shërbimeve roaming në rrjetet publike të komunikimeve të lëvizshme në rajonin e Ballkanit Perëndimor është nënshkruar nga ministritë përgjegjëse për komunikimet elektronike të gjashtë vendeve të Ballkanit Perëndimor Shqipëria, Bosnja dhe Hercegovina, Kosova, Maqedonia e Veriut, Mali i Zi, dhe Serbia në Beograd, më 4 prill 2019.
Operatorët e telekomunikacionit do të kenë të drejtë të aplikojnë shtesa mbi këto tarifa. Sipas të dhënave të AKEP, tre operatorët celularë që operojnë në tregun vendas kanë dorëzuar tarifat që do të zbatojnë.
Qytetarët shqiptarë pritet të jenë ndër përfituesit më të mëdhenj nga kjo marrëveshje, për shkak të përdorimit më të lartë të “roaming” krahasuar me shtetasit e rajonit që vijnë në Shqipëri, por edhe për shkak të kostove të larta që tashmë kursejnë.
Në bazë të marrëveshjes, tarifat “roaming” me pakicë nuk duhet të jenë më të larta se 0.19 euro/minutë, 0.06 euro/SMS dhe 0.18 euro/MB. Kjo përkthehet në një kursim deri në 10 herë të qytetarëve shqiptarë.
