I premtoi një gruaje se do e bënte ortake dhe i mori 270 mijë euro, Gjykata dërgon “në shtëpi” pronarin e agjencisë së udhëtimeve

Bashkohuni me grupin tonë zyrtar në Facebook duke klikuar këtu!

Gjykata e Tiranës ka dhënë masën e sigurisë “Arrest në shtëpi” për pronarin e një kompanie udhëtimesh turistike, Andi Alimehmeti, i cili i ka marrë një gruaje rreth 270 mijë euro.

51 vjeçari i ka premtuar shtetases së sipërpërmendur, se do ta bënte ortake në kompaninë e tij. Mirëpo, pasi ka paguar lekët, gruaja ka zbuluar mashtrimin dhe ka denoncuar Alimehmetin, i arrestuar dy ditë më parë nga Policia.

Rasti në fjalë është regjistruar në vitin 2017 por është denoncuar ditët e fundit në policinë e Tiranës, pranë seksionit për hetimin e krimit ekonomik dhe financiar.

Andi Alimehmeti dyshohet se ka mashtruar dhe disa persona të tjerë, duke u marrë sasi të caktuara parash, pasi ka qenë i proceduar dhe më parë për veprën penale “Mashtrimi”.