Ditën e sotme rikthehen rregullat e mëparshme për lejimin e qarkullimit deri në orën 22 të mbrëmjes.
Ky kufizim është vendosur nga Komiteti Teknik i Ekspertëve për të parandaluar përhapjen e pandemisë së COVID-19. Gjithashtu ditën e sotme rifillon mësimi edhe për studentët, online ashtu siç nisi viti akademik.
Ndërsa sezoni i festave nuk mbaron për nxënësit më datë 4 janar siç ishte planifikuar nga Ministria e Arsimit në urdhrin e nxjerrë në shkurt të 2020, pasi në kushtet e pandemisë pushimet dimërore për sistemin parauniversitar do të jenë deri në 11 janar, ndryshim i reflektuar në urdhrin e miratimit të strukturës së këtij viti shkollor.
Për 12 ditë, nga data 24 dhjetor deri në 4 janar për parandalimin e grumbullimeve gjatë festave të fundvitit u shtuan masat e reja anti-covid duke kufizuar lëvizjen nga ora 20:30 deri në 06:00.
Të gjithë ata që shkelin orën policore, gjobiten sipas aktit Normativ që është në fuqi. Nisur nga ky kufizim i lëvizjes së qytetarëve, edhe baret dhe restorantet, të konsideruara nga Komiteti Teknik i Ekspertëve si një vatër e rrezikshme e përhapjes së virusit, do të hapen në orën 06:00-22:00.
Lejimi i lëvizjes do të lejohet vetëm për urgjenca apo punë duke marrë leje në portalin e e-Albania.
Kujtojmë se ditën e djeshme numri i të infektuarve me COVID ra ndjeshëm, me 185 raste të reja dhe 6 humbje jete.
