Jul Deda ka reaguar publikisht ndaj disa pretendimeve që, sipas tij, janë të rreme dhe po qarkullojnë në rrjet. Aktori mohon se është nën hetim penal, hedh poshtë pretendimet që lidhin largimin e tij nga Top Channel me probleme personale dhe njofton se çështjen do ta ndjekë ligjërisht.
Në një komunikim të cilin e cilëson vetë “të pazakontë”, Deda thotë se është detyruar të flasë pas publikimit të informacioneve që ai i konsideron shpifëse.
Një nga pretendimet ndaj të cilave reagon lidhet me lajmin se ai dyshohet se është nën hetim nga strukturat e Krimit Kibernetik të Policisë së Shtetit.
“Kjo nuk është e vërtetë. Unë nuk jam nën asnjë hetim penal”, deklaron Deda.
Aktori pretendon se disponon edhe një dokument zyrtar nga Prokuroria në Tiranë, i cili, sipas tij, vërteton se nuk rezulton procedim penal në emrin e tij.
Ky dokument nuk është verifikuar në mënyrë të pavarur nga IMA, ndaj deklarata paraqitet si qëndrimi publik i vetë Dedës.
Flet edhe për largimin nga Top Channel
Një pjesë tjetër e reagimit lidhet me përfundimin e bashkëpunimit të tij me Top Channel.
Deda mohon kategorikisht pretendimet që e lidhin largimin e tij me varësinë ndaj bixhozit apo me probleme të tjera personale.
Sipas versionit të tij, kontrata me Top Channel përfundoi më 31 gusht me marrëveshje të dyanshme, për shkak të riformatimit të emisionit ku ai ishte i angazhuar.
Ai kërkon gjithashtu që vetë televizioni të reagojë ndaj pretendimeve që po qarkullojnë.
Në mungesë të një qëndrimi të Top Channel që konfirmon këto rrethana, edhe ky version duhet trajtuar si deklarata e Dedës për mënyrën se si përfundoi marrëdhënia kontraktuale.
Denoncon edhe një llogari të rreme
Deda ngre gjithashtu pretendimin për përdorimin e identitetit të tij në rrjet.
Ai thotë se një adresë emaili me emrin e tij, e paraqitur në një faqe Instagrami, nuk i përket atij dhe pretendon se është krijuar një llogari e rreme për publikimin e materialeve denigruese.
Në përfundim, aktori paralajmëron se nuk do ta lërë çështjen vetëm në nivelin e reagimit publik.
“Unë fola. Tani e ka radhën ligji”, deklaron ai, duke bërë të ditur se avokati i tij do të ndjekë hapat ligjorë që i konsideron të nevojshëm për mbrojtjen e reputacionit të tij.
