Kinemaja europiane, përfshi dhe atë ballkanike është, prej së paku një dekadë, në krizë për publik. Mungesa e rrjetit të kinemave indipendente, mungesa e distributorëve të specializuar në vendet ballkanike dhe përmbytja e tregut nga filmat amerikanë, në një farë mënyre e kanë larguar shikuesin nga pasioni për filmat europianë.
Në Balkan Film Market producentë dhe distributorë të ndryshëm parashtruan disa prej ideve se si mund të dilet nga kjo krizë dhe si të edukohet publiku me filmin europian. Teksa e ardhmja e shijimit të filmit si produkt nuk është vetëm televizioni apo ekrani i madh por edhe mënyrat alternative si VOD platforms dhe teknologjitë e reja që po eksperimentohen, Paola Corvino, e cila ka shitur për herë të parë autorë si Tornatore apo Sorrentino, thotë se ekrani i madh i shërben lidhjes mes njerzve përtej çdo teknologjie apo tendence.
Ndonëse producentët europianë kanë pritshmëri të caktuara mbi filmin ballkanik mbi një lloj ekzotizmi që ai duhet të përmbajë gjithsesi barrierat e komunikimit të kinemasë me publikun, përtej festivaleve duhen rrëzuar përmes produkteve origjinale, risive dhe mënyrës se si i flasin botës emocionale të publikut.
