Një 17-vjeçar nga Elbasani ndërroi jetë dy ditë më parë pasi kishte një javë i shtruar në spitalin “Shefqet Ndroqi”. Ai ishte infektuar me Covid-19 bashkë me prindërit e tij dhe ndodhej në gjendje të rëndë shëndetësore, pavarësisht se nuk kishte sëmundje bashkëshoqëruese.
Adoleshenti raportohet se ka qenë prej një jave në terapi intesive dhe më pas në intubim, për shkak se virusi i kishte prekur pothuajse 100% të mushkërive të tij.
Ditën e sotme shefja e Reanimacionit tek COVID-2, Alma Cani, ka dhënë një intervistë për ABC News, ku ka folur më shumë rreth ngjarjes që ka prekur të gjithë mjekët, teksa ajo e ka cilësuar si një prej rasteve më të vështira.
“Trajtoheshin më tepër se dhjetë ditë në shtëpi. Fatkeqësisht djali erdhi në situatë të avancuar, rezultonte me analizat që bëmë dhe skanerin që tregonte se prekja e mushkërive ishte 100%. Nuk kishte mushkëri që të merrte frymë. Ndoshta dhe ardhja me vonese ishte pjesë e kësaj drame”, thotë mjekja.
Sakaq, Cani me lot në sy ka treguar se 17-vjeçari para se të ndërronte jetë u ka kërkuar falje, duke u thënë se i kishte lodhur.
“Megjithë përpjekjen që ne bëmë me shpirt, asistencat që u bënë në të gjitha drejtimet dhe ato fjalët e atij djali që më janë ngulitur mua dhe jo vetëm, por të gjithëve këtu: O teta më falni se ju lodha. E kuptonte dhe vetë që ne po përpiqeshim për t’i dhënë jetë, por ishte e pamundur”, tregon Cani.