Edhe pse në fillimet e karantinës na u duk sikur s’do të ktheheshim kurrë më në realitet, gjërat kanë ndryshuar dhe thuajse të gjithë po përpiqemi të ecim përpara ose aty ku e lamë, më të kujdesshëm se kurrë. Dhe kjo nuk vlen veç për aktivitetet e përditshme, por edhe për organizime më madhore si për shembull “Miss Shqipëria 2020”.
Dy ditë më parë, kompeticioni më i rëndësishëm të bukurisë në vend ngriti siparin në “Shtëpinë e Kongresit” në Lushnjë, ku morën pjesë 26 vajza nga të gjitha trevat që përveç vlerësimit të publikut, u gjykuan edhe nga një juri profesioniste. Kurora e më të bukurës i takoi Iliada Bazit.
Mirëpo një nga vajzat që spikati me bukurinë dhe sharmin e saj ishte Françeska Rustemi, e cila arriti të rrëmbente jo vetëm vëmendjen e publikut por edhe dy çmime mjaft të rëndësishme. Françeska u shpall “Shoqëruesja e parë e Missit” si dhe Miss “Stop”, që do të thotë që do ta shohim si velinë në ekran në emisionin “STOP”.
Edhe pse 16 vjeç, Françeska nuk është një emër i panjohur për publikun, sidomos për lexuesit e revistës “Living” të cilët e kanë parë në numrin e fundit në editorialin “Pranvera rikthimi i përjetshëm”. Bukuroshja nga Durrësi nuk mund t’i shpëtonte syrit të kryeredaktores së modës, Santana Çomora, e cila e solli atë në një version floreal dhe stylish. Na bëhet qejfi që vajzat që promovon revista jonë ia dalin të çajnë në botën e modës dhe spektaklit, ndaj s’na ngelet veçse t’i urojmë suksese Françeskës.
Foto e mësipërme janë marrë nga numri i fundit i revistës Living dhe janë realizuar nga Armand Habazaj.