I ftuar në studion e “Ditarit” në A2, Ilir Beqaj, deputet i Partisë Socialiste, foli për situatën e pandemisë në vend, por edhe për procesin e vaksinimit dhe dozat e para që kanë ardhur tashmë në Shqipëri.
“Jemi 10 muaj në pandemi të plotë. Bazuar në të dhënat, ku dy treguesit kryesorë janë fatalitetet dhe rastet e deklaruara, Shqipëria është një nga vendet e prekura më pak në Europë. A është kjo meritë e qeverisë? Nuk mund ta them. Nuk kemi parë mbingarkesë të tejskajshme në spitale. Për fat të mirë, kemi filluar edhe procesin e vaksinimit. Për fat të mirë, vaksina e Pfizer i përballon edhe mutacionet e fundit. Megjithatë, ne sërish jemi përballë së panjohurës.
Beqaj u pyet edhe se nga ka ardhur vaksina në Shqipëri, për të cilën konfirmoi vetëm se ajo ka dalë nga fabrika e Pfizer në Gjermani. Ndërkohë, ai theksoi se dozat e vaksinës ruhen në kushte optimale.
“Dihet se nga kanë ardhur, nga fabrika e Pfizer në Gjermani. Kjo është një gjë publike. Pfizer do të furnizojë shumë shtete. Ka ardhur nga Gjermania në aeroportin e Rinasit dhe sot administrohet në kushte optimale. Me zinxhirin ftohës të administrimit të vaksinave, Shqipëria është e zonja prej 30 vjetësh. Vaksinat bëhen kudo.
Ne na erdhën vaksinat. Unë besoj se përveç marrëdhënies kontraktuale që kemi me Pfizer, përveç se kemi paguar në nëntor te Covax, nuk është çudi që të na vijnë sërish. Ka vende europiane, të cilat me një lloj egoizmi, u bënë bashkë në BE për të marrë sa më shumë doza, por sot nuk i përdorin dot. Ka shtete që kanë teprica vaksinash, që pa dëmtuar shtetasit e tyre, mund t’ia japin vendeve si Shqipëria”, u shpreh Beqaj.
Pak ditë më parë, A2 pyeti qeverinë gjermane, nëse dozat e vaksinave që kanë ardhur në Shqipëri ishin dhuratë nga Gjermania, por kjo u mohua.
