Drejtoria e Përgjithshme e Burgjeve i ka dërguar një shkresë Ministrisë së Drejtësisë ku i kërkohet që të miratojnë uniformat e detyrueshme për gati 4700 të burgosur në Shqipëri.
Drejtoria e Përgjithshme këmbëngul se kjo duhet të miratohet pasi është e detyruar dhe me ligj që të vishen me uniformë standarte të burgosurit.
Drejtori i Përgjithshëm i Burgjeve, Agim Ismaili ka pohuar për ‘Top Channel’ se kjo u vu re si problematikë pas aplikimit të regjimi 41 bis ku thuhej se personat që cilësohen me rrezikshmëri të lartë të mos marrin asgjë nga jashtë qelisë e në këtë formë do iu duhej uniforma. Si fillim propozohet që kostumi dimëror të jetë ngjyrë gri e errët, ndërsa veshja verore po ashtu në të njëjtën ngjyrë.
“Bëhet për shumë arsye, por edhe për të shmangur arratisjen dhe dallimin e tyre në rast se largohen”, shprehet Ismaili.
Në shkresën e drejtuar Ministrisë thuhet se kosotoja për të përballuar veshjen e të burgosurve do të mbulohet nga buxheti i shtetit.
