Grumbullimet dhe tubimet në vendin tonë do të jenë të ndaluara deri në datën 25 Mars, për shkak të pandemisë Covid-19. Ky vendim është marrë nga Komiteti Teknik i Ekspertëve dhe është botuar në fletoren zyrtare sot, pas kërkesës së Gjykatës Kushtetuese për caktimin e afateve konkrete të tij. Ka qenë një padi e Partisë Republikane, e cila kërkonte nga Ministria e Shëndetësisë dhe Komiteti Teknik i Ekspertëve lejimin e grumbullimeve, duke i kërkuar atyre ndër të tjera të përcektonin se deri kur do të zbatohet mos lejimi i grumbullimeve pasi në vendim nuk përcaktohej. Pas kërkesës së PR, Komiteti dhe Ministria kanë marrë vendimin që të vendosin 25 marsin si afatin për mbarimin e ndalimit të grumbullimeve.
“Në mbështetje të nenit 102, pika 4, të Kushtetutës së Republikës së Shqipërisë, të nenit 7, pika 4, të ligjit nr. 15/2016, “Për parandalimin dhe luftimin e infeksioneve dhe sëmundjeve infektive”, të udhëzimeve të Institutit të Shëndetit Publik, me qëllim mbrojtjen e shëndetit të popullatës nga infeksioni i shkaktuar nga COVID-2019, si edhe vendimit të Komitetit Teknik nr. 1356, datë 11. 3. 2021,
URDHËROJ: Në urdhrin nr. 633, datë 17.11.2020, “Për ndalimin e grumbullimeve në vende të mbyllura apo të hapura”, bëhet ndryshimi si vijon:
Në pikën 1 të urdhrit, togfjalëshi “deri në një urdhër të dytë” zëvendësohet me togfjalëshin “deri në datën 25.3.2021”- thuhet në vendim.
Në datën 4 dhjetor PR depozitoi një padi ku kërkonte rrëzimin dhe shfuqizimin e urdhrit të ministres së Shëndetësisë, Ogerta Manastirliut, të datës 17 nëntor 2020, që ndalon grumbullime me shumë se 10 persona, tubimet, mbledhjet partiake, ceremonitë martesore etj, të cilat nuk kishin një afat të fundit se kur mund të mbaronin. Në vendimin e saj pas shqyrtimit të kësaj padie, Gjykata Kushtetuese, deklaroi se vendimi i kufizimeve pa afat, cënon nenin 17 të Kushtetutës dhe prandaj u bë edhe ndryshimi i mësipërm. Megjithatë pritet të shihet nëse 25 marsi do të jetë vërtetë fundi i mos lejimit të tubimeve dhe grumbullimeve, apo do të ketë një shtyrje të tij nga Komiteti.