Në bashkinë e Kurbinit vijon puna me ritme të larta për ndërtimin e Lotit 1 dhe Lot 2 në veprën e ujësjellësit të ri të Laçit që do të garantojë 24 orë ujë të pijshëm e me cilësi.
Kryetarja e bashkisë Kurbin, Majlinda Cara ndau sot foto nga ky kantier, ku po punohet intensivisht për ta përfunduar veprën brenda afateve.
“Ky investim i qeverisë shqiptare është një ndër kantieret më të mëdha të ujit që janë në ndërtim dhe synon të përmirësojë cilësinë e jetës për afro 30.000 qytetarë të Laçit”, tha ajo.
Infrastruktura ekzistuese në ujësjellësin e Laçit është prej vitit 1965 me rrjet 55-vjeçar tërësisht të degraduar. Po ashtu, 88.2% e konsumatorëve janë pa ujëmatësa.
Ndërkohë që burimet ujore të Kurbinit janë nga më cilësoret, më të pastrat dhe me prurjet më të mëdha në vend, mijëra banorë nuk aksesojnë dot ujin jetik për ta dhe zhvillimin e zonës.
