Në Tiranë vijon procesi i vaksinimit antikovid të pedagogëve, që pritet të shtrihet dhe në qytete të tjera universitare si Korça, Vlora apo Durrësi.
Gjatë dy ditëve të para të këtij procesi janë vaksinuar mbi 500 pedagogë. Pedagogët në qendrën e vaksinimit pranë Universitetit Politeknik të Tiranës ushprehën për ATSH-në optimistë për përmbylljen e pandemisë.
Mbi 90% e pedagogëve të lajmëruar paraqiten për t’u vaksinuar, ndërsa sipas informacioneve tek qendra e vaksinimit dhe ata që nuk janë paraqitur, kanë shtyrë ditën e vaksinimit për shkak të axhendës së tyre në universitet, provimeve, apo të tjera arsye objektive.
“Ishte një vendim që kur na erdhi në departament për herë të parë e pranova direkt. Jam optimiste sepse është është gjëja më e mirë që mund të bëhet. Unë kam informacion dhe kam të afërm në Angli që janë vaksinuar me AstraZenekën dhe s’kanë pasur asnjë efekt anësor ndaj jam pozitive për ta bërë. Patjetër sepse për mua vaksinimi është gjëja më e mirë që duhet bërë”,- tha njëra prej pedagogëve të intervistuara nga ATSH.
“Shumë mirë ndihem deri më tani nuk ka probleme sepse është një mundësi për t’u mbrojtur. Përderisa vaksina ka legjitimitet atëherë përse mos ta bëjmë”, u shpreh një tjetër.
“Jam shumë mirë dhe e qetë. Nuk di ndonjë gjë të veçantë që është jashtë të përditshmes, kuptohet që emocionet janë dhe nuk i përjashtojmë. Nuk e kam vënë asnjëherë në dyshim për të mos e bërë. Unë jam njeri që i besoj shumë shkencës sepse s’mund të jem ndryshe dhe kam qenë që në sekondën e parë totalisht e gatshme pavarësisht dyshimeve që ishin. Personalisht e kam kaluar në tetor dhe ndoshta mund të mendohesha dy herë por s’kam menduar asnjëherë që të mos e bëj”,- thanë të tjerë pedagogë për ATSH.
“Ndjehem shumë mirë dhe shumë mirë që na është krijuar mundësia. Përderisa është e ligjëruar nga shteti ynë përse jo? Jam shumë e qetë sepse çdo gjë shkoj mirë. Jemi të qetë që e kryem vaksinën që të mos na ngelet pishman pavarësisht se e kam kaluar. Kam dëgjuar që shpesh ka riinfektime dhe e quaj fat që erdhi momenti për ta bërë këtë vaksinë nga shteti”,- u shpreh një tjetër pedagoge.
“Të gjithë njerëzit e mi që ndodhen jashtë kanë bërë këtë vaksinë dhe apeloj ta bëjnë të gjithë në mënyrë që të ruajmë shëndetin”; “Shumë normal dhe s’kemi asnjë gjë në mënyrë absolute. Vaksina duhet bërë patjetër sepse s’ka asnjë rrugë tjetër përveç vaksinës”, thanë të tjerë.
“Jam shumë i gëzuar. Është me mundësi zgjedhje të lirë nëse e bën apo jo por që unë mendoj se nëse është mundësia për tu vaksinuar, duhet bërë me patjetër”,- thanë pedagogë për ATSH.
