Për shumë shqiptarë, personazhi i vogël i Lulushit në filmin e njohur shqiptar Horizonte të hapura (1968) mbetet një nga figurat më të dashura të kinematografisë së asaj kohe. Por pak njerëz e dinë se “djali” i vogël i Uranit në film ishte në të vërtetë një vajzë.
Bëhet fjalë për Enit Kaduku Kokalari, e cila në kohën e xhirimeve ishte vetëm rreth 5 vjeçe. Me interpretimin e saj natyral dhe të ndjerë, ajo u bë pjesë e një prej filmave më të njohur të kinemasë shqiptare.
Një tjetër detaj interesant është se në të njëjtin film luante edhe mamaja e saj, Artemis Kokalari, e cila interpretonte rolin e edukatores së çerdhes. Kështu, nënë e bijë ndanë së bashku ekranin në një film që edhe sot kujtohet me nostalgji nga publiku.
Megjithëse u bë e njohur që në fëmijëri përmes kinemasë, Enit Kokalari zgjodhi një rrugë krejt tjetër në jetë. Ajo studioi Matematikë në Fakultetin e Shkencave të Natyrës dhe më pas ushtroi profesionin e pedagoges, duke iu përkushtuar arsimit dhe shkencës.
Përveç karrierës akademike, Enit Kokalari është angazhuar prej vitesh në ruajtjen dhe promovimin e trashëgimisë së familjes Kokalari, veçanërisht të Musine Kokalarit, një prej figurave më të rëndësishme të kulturës, letërsisë dhe rezistencës antikomuniste shqiptare.
Sot ajo jeton në Shtetet e Bashkuara të Amerikës me familjen e saj, por vazhdon të mbetet aktive në aktivitete kulturore, konferenca, simpoziume dhe ngjarje përkujtimore që mbajnë gjallë kujtesën historike të familjes Kokalari dhe të Musine Kokalarit.
Nga një fëmijë që interpretonte para kamerave në fundin e viteve ’60, në një pedagoge, studiuese dhe mbrojtëse të trashëgimisë kulturore shqiptare, historia e Enit Kokalarit mbetet një nga rrëfimet më interesante që lidhen me kinematografinë shqiptare.
