Prokuroria e Tiranës ka pushuar akuzat për tre të arrestuarit për vrasjen e Jurgen Kurtit në mes të Tiranës, mbrëmjen e 19 marsit 2019. Menaxheri i VIP-ave u qëllua me breshëri plumbash sapo doli nga palestra, shumë pranë shtëpisë, në zonën e Sheshit Wilson.
Kështu, është pushuar akuza për vrasje dhe pjesëmarrje në vrasje, për tre të akuzuarit Alesio Berberi, Olsi Qalliaj dhe Elis Levendi, si dhe për Klodian Banen, i njohur me nofkën “Buxhaku”. Bane nuk është kapur nga policia dhe dyshohej nga Prokuroria e Tiranës se ishte pikërisht ekzekutori i Jurgen Kurtit. Tashmë ndaj tij nuk ka më asnjë akuzë.
Ndërkohë, për Elis Levendin edhe pse është pushuar akuza për këtë vrasje, ai do të qëndrojë në burg për një tjetër vepër penale, atë të armëmbajtjes pa leje. Me pushimin e akuzës për tre të arrestuarit dhe Klodian Banen në arrati, vrasja e Jurgen Kurtit mbetet pa autor.
I njohur për jetën lukzose dhe i akuzuar për përfshirjen në disa ngjarje kriminale, më e rënda ajo e vrasjes së babait të tij, ekzekutimi i 26 vjeçarit tronditi kryeqytetin. Autorët dyshohet se kanë qenë vrasës profesionistë pasi u kujdesën të mos linin gjurmë.
