Durrësi ka nisur të marrë frymë lirisht pas heqjes së mbeturinave nga rrugët e trotuaret dhe depozitimit të tyre në Sharrë.
Megjithatë situata mbetet kritike, ndaj Bashkia dhe këshilli bashkiak i Durrësit pritet të kërkojnë shpalljen e emergjencës mjedisore në territorin e bashkise.
Pas një miratimi paraprak nga ana e Ministrisë së Financave për një fond të dedikuar për mbetjet urbane deri në dhjetor të këtij viti, ndërmarrja komunale e bashkisë nisi pastrimin e qytetit dhe dërgimin e tyre në landfillin e Sharrës.
Për shkak të situatës së krijuar në venddepozitimin e mbetjeve urbane në Porto Romano, Vadardhë dhe Manëz, Këshilli Bashkiak i Durrësit shpalli emergjencën mjedisore fillimisht në korrik të vitit 2018, ndërsa qeveria kërkoi nga kryebashkiaku i atëhershëm të niste bisedimet me kompaninë koncensionare të inceneratorit të Sharrës, po pa rezultat.
Për shkak të kostove të larta dhe problemeve të tjera me të cilat u përball bashkia, marrëveshja nuk u arrit. Mbyllja e venddepozitimit të Porto Romanos të kthyer në një gangrenë për qytetin krijoi një problem dhe më të madh për qytetarët. Plehrat pushtuan rrugët. Depozitimi i mbetjeve në Sharrë kapte vlerën 29 euro/ton.
Bashkia u përball me mungesën e fondeve për të dërguar dhe trajtuar mbetjet e saj në Sharrë, si dhe me rebelimin e banorëve të Manzës e Sukthit për të hedhur mbetjet në territorin e tyre.
Me shpalljen e emergjencës mjedisore, bashkia e Durrësit kërkon mbështetje për menaxhimin e kësaj emergjence nga Komiteti Ndërministror i menaxhimit të integruar të mbetjeve duke synuar zgjidhjen afatgjatë të problemit.
