Radhët e gjata të krijuara në pikat kufitare në Kakavijë dhe Kapshticë krijuan një kaos të mirëfilltë, ndërsa udhëtarët e kanë kritikuar ashpër qeverinë shqiptare për keqmenaxhim të situatës.
Krahas qytetarëve, qeveria dhe kryeministri Edi Rama, është sulmuar nga opozita e bashkuar, por edhe nga vetë Presidenti i Republikës, Ilir Meta, i cili apeloi për zgjidhje të problemit, dhe që qytetarëve që kishin pritur në radhë t’u kryhej falas testi për Covid-19.
Sipas tij, qytetarët në Kakavijë dhe Kapshticë u trajtuan si të ishin pa atdhe dhe pa shtet. Por, krahas radhëve të gjata të mjeteve në këto dy pika kufitare, ngjarja që shkaktoi reagime të shumta ishte aksidenti fatal, ku një autoambulancë përplasi për vdekje një fëmijë 10-vjeçar nga Lezha.
Reagimet e zyrtarëve shtetërorë
Ky episod fatal shtoi më tej reagimet publike, ku një pjesë prej tyre fajin për aksidentin e fëmijës e panë tek mungesa e përkujdesjes nga ana e prindërve. I këtij mendimi ishte drejtori i Transportit Rrugor, Belendi Gonxhja, i cili theksoi se i mituri nga Lezha humbi jetën për shkak të një pakujdesie nga ana e prindërve.
“Apo kur fëmijën 10-vjeç e lë t’i presi rrugën ambulancës, e humb se nuk kujdesesh si prind/përgjegjës për krijesën tënde! Hijenat e korbat po mblidhen rreth e sipër Kakavijës që të shkëlyejnë ç’të dali, por përse të bëhemi pakujdesisht pre e tyre?! Media ka përgjegjësi të informohet saktë e analizojë mirë përpara sesa t’i japi zë një derti të tillë! Shteti shqiptar s’ka asnjë tagër mbi virusin apo mbi fqinjët! Mbro veten, familjen! Nëse nuk ke ngut, kthehu”, shkroi Blendi Gonxhe.
Kjo deklaratë e Gonxhes në rrjete sociale shkaktoi kritika të forta, aq sa u detyrua që të fshinte postimin nga llogaria personale. Kryeministri i vendit, Edi Rama reagoi një ditë më parë për aksidentin në Bularat, ndërsa tha se fëmija 10 vjeç, që humbi jetën dy ditë më parë, ia preu rrugën autoambulancës dhe për pasojë nuk arriti të mbijetonte.
“Humbja e jetës së fëmijës që i preu rrugën autoambulancës ishte një tragjedi e dhimbshme sa s’ka dhe ne nuk do të mjaftohemi thjesht me ngushëllimet e sinqerta me fjalë që as nuk gjenden dot, për atë familje të goditur nga ajo fatkeqësi e tmerrshme. Por nuk është gjëkundi as kjo një arsye për të urryer fqinjin apo mallkuar shtetin”, shkroi Rama në “Facebook”.
Sondazhi i kryer nga Euronews Albania për situatën në Kakvijë dhe aksidentin tragjik
Euronews Albania teksa ka ndjekur nga afër zhvillimet në pikat kufitare, zhvilloi edhe një sondazh në rrjetet sociale për t’i pyetur qytetarët se çfarë mendonin realisht për reagimet e zyrtarëve për menaxhimin e situatës së krijuar në Kakavijë si dhe për ngjarjen tragjike ku humbi jetën 10-vjeçari nga Lezha.
Shumica e qytetarëve, të cilat kanë shprehur mendimin në sondazh thonë se deklarimet e tyre kanë qenë të nxituara dhe të papranueshme.
Por, ka edhe prej atyre që mendojnë se politikanët janë treguar korrektë, ndërsa të tjerë thonë se për ngjarjen tragjike duhet të priten rezultatet e hetimeve zyrtare.
Kryeministri Edi Rama duket që ka reflektuar dhe ka ndjerë përgjegjshmërinë institucionale për ngjarjen në Bularat të Gjirokastrës. Këtë të hënë, shefi i mazhorancës lajmëroi në “Twitter” se qeveria shqiptare ka vendosur ta ndihmojë financiarisht me 500 mijë lekë të reja familjen e 10-vjeçarit nga Lezha, i cili u përplas tragjikisht nga një autoambulancë.
Dëshmitarët nga vendngjarja, ditën e aksidentit, i thanë Euronews Albania se autoambulanca që i shkaktoi vdekjen të miturit nga Lezha nuk kishte brenda asnjë person të sëmurë, siç njoftuan autoritetet shtetërore. Sipas tyre, autoambulanca po lëvizte me shpejtësi dhe tej normave të lejuara.
Policia e Shtetit në versionin e saj zyrtar për ngjarjen tha se, në autoambulancë ka qenë një shtetase e sëmurë. Sipas saj, shtetasja e sëmurë menjëherë pas aksidentit ku humbi jetë i mituri është transportuar në Spitalin e Gjirokastrës, ndërsa drejtuesi i atutoambulancës është shoqëruar në komisariat.
Grupi hetimor ndërkohë vijon hetimet për zbardhjen e plotë të rrethanave për aksidentin që i shkaktoi vdekjen të miturit, i cili po priste prej ditësh në radhë në Kakavijë, me shpresën për të kaluar drejt Greqisë.
Sot vendosëm që si qeveri të asistojmë familjen e të miturit që humbi tragjikisht jetën pasi i preu rrugën autoambulancës në Kakavi, me një shumë prej 500.000 lekësh të reja, duke i rishprehur dhe njëherë familjes ngushëllimet tona më të ndjera😢Engjëlli i vogël u dhëntë forcë🙏
— Edi Rama (@ediramaal) August 17, 2020
