Radio Tirana “Akademia” e parë e gjuhës letrare shqipe duke e ruajtur dhe kultivuar atë në 80-të vite histori të saj. Përmes emisioneve informative njohëse, edukative dhe kulturore, ajo ka luajtur një rol të pa zëvendësueshëm në përçimin e vlerave kulturore të popullit shqiptar. Veç vlerave të saj artistike e kulturore, kjo radio përmban një vlerë kombëtare, arkivin në të cilën ndodhen zëra unikë. Historiku i Radio Tiranës daton më 28 nëntor të vitit 1938. Pikërisht kjo datë shënon transmetimin e parë të Radio Tiranës e cila në atë kohë është përshkruar nga një entuziazëm i madh në tërë Shqipërinë. Sot rrjeti i Radio Tiranës, me një zhvillim më të avancuar teknologjik është e përhapur në pesë kanalet e saj.
Radio Tirana 1 është kanali kryesor gjeneralist i radios ndërtuar me programe për të gjithë moshat. Mbulon me lajm hapësirat lokale e rajonale, trajton çështje që janë me interes kombëtar duke qenë në shërbim të individit dhe komuniteteve të ndryshme, ofron programe social-kulturore, programe argëtuese, show radiofonik, radio dramatizime, sport, programe muzikore . Hapësirat që i dedikohen secilit target grup janë në një rrafsh gjithëpërfshirës. Radio Tirana 2 në programacionin e saj ka muzikën si shtyllë kryesore e përmbajtjes që ajo transmeton e cila ofrohet për audiencën përzgjedhur nga deejay në rrymat, pop, rock, dance, house, mix, r&b, blues, jazz, soul bashkëshoqeruar me informacione flash, turizëm, gastronomi, show biz, sport, humor, preferenca, lojra. Radio Tirana 3 është në funksion të bashkëatdhetarëve si destinacion dëgjuesish por në format të ri programor. Radio Tirana Klasik vjen me misionin për të kënaqur shijet e publikut, por edhe për t’i kultivuar ato . Me synimin për të promovuar muzikën klasike shqiptare dhe njohjen e veprave dhe autoreve të medhenj. Interpretë të shquar shqiptar, kompozitorë të njohur; interpretues botëror. Radio Tirana International i ka fillesat e saj qysh me themelimin e Radio Tiranës, ku nisi me transmetimin e lajmeve të shkurtra në disa gjuhë të huaja, si italisht, frëngjisht dhe anglisht.Sot transmetojmë në 7-të gjuhë të huaja konkretisht në anglisht, gjermanisht, frëngjisht, italisht, turqisht, greqisht dhe serbisht.
Për të kujtuar rrugën, punën, arritjet e këtij institucioni të rëndësishëm mediatik, si dhe kontributin e shumë personaliteteve të mikrofonit shqiptar, RTSH në kuadër të 80-të vjetorit të krijimit të institucionit të parë mediatik në Shqiperi organizon mbrëmjen gala “ Ju flet Tirana” Kronika e përditshme e jetës së Kombit ! Më datë 27 nëntor, ora 18:00 në Sallën Unesco të Muzeut Historik Kombëtar.
